तानसेन । पाल्पामा नयाँ ट्राफिक प्रहरी प्रमुख आउनुभएको छ । जिल्ला ट्राफिक प्रहरी कार्यालय पाल्पामा प्रमुखको रुपमा प्रहरी वरिष्ठ नायव निरीक्षक प्रविण आचार्य आउनुभएको हो । सात वर्ष अघि जिल्लाको ट्राफिक व्यवस्थापन, सवारी दुर्घटना न्यूनीकरण र ट्राफिक कार्यालय भवन निर्माण कार्यमा उत्कृष्ट भूमिका निर्वाह गर्नुभएका आचार्य पुनः पाल्पा ट्राफिकको जिम्मेवारी सम्हाल्न आउनुभएको हो ।
आइतबार प्रमुख आचार्यले पाल्पाका पत्रकारसंग जिल्लाको ट्राफिक व्यवस्थापन र दुर्घटना न्यूनीकरणका विषयमा सुझाव संकलन गर्नुभएको छ । पाल्पाको भौगोलिक अवस्था, साँघुरा सडक, उकालो ओरालो, तथा बढ्दो सवारी चापबाट उत्पन्न हुनसक्ने समस्याहरुलाई व्यवस्थापन गर्ने समन्वय र सहकार्यको वातावरण तयार गर्नका लागि सुझाव लिइएको प्रमुख आचार्यको भनाइ छ ।
कार्यक्रममा सहभागी पत्रकारहरुले टिपर आतंक रोक्न, ओभरलोड तथा स्पिड नियन्त्रण गर्नुपर्ने, एउटै प्रकृतिका सवारीसाधनमा समान नियमन, बजार क्षेत्रमा दिन अनुसार एकतर्फी पार्किङ व्यवस्था, नियमित सवारी चालक अनुमतिपत्र र मापसेको अनुगमन तथा चेकिङ, विद्यालय र क्याम्पसहरूमा ट्राफिक सचेतना, मिडियामा ट्राफिक नियम र दुर्घटना न्यूनीकरण सम्बन्धी सन्देश प्रवाह, चालक र पैदल यात्रुका लागि प्रशिक्षण, पार्किङ क्षेत्र निर्धारण, भिडहुने क्षेत्रमा सवारीको रुट र समय निर्धारण गर्नुपर्ने सुझाव राखेका थिए । यस्तैगरी बजार क्षेत्रमा साँघुरो सडकमा निर्माण सामग्री राख्ने र ग्यारेज संचालन गर्ने गरेकोले यस विषयको पनि व्यवस्थापन गर्नुपर्नेमा पत्रकारहरुले सझाव राखेका थिए ।
कार्यक्रममा नेपाल पत्रकार महासंघ पाल्पाका अध्यक्ष कमलराज तिमिल्सेनाले पाल्पाको ट्राफिक व्यवस्थापनका सन्र्दभमा प्रमुखले पत्रकारहरु संग सुझाव लिने पहिलो कार्यक्रम भएको बताउनुभयो । उहाँले पछिल्ला ट्राफिक प्रहरी प्रमुखहरुको काम प्रभावकारी रहेको बताउदै पाल्पाली पत्रकारहरुले सधै प्रहरीको गुण र दोषका आधारमा सघाउदै आएको बताउनुभयो ।
प्रमुख आचार्यले प्राप्त सुझावहरुलाई आत्मसाथ गरेर जिल्लाको ट्राफिक व्यवस्थापनमा प्रभावकारी रुपमा काम गर्ने प्रतिबद्धता व्यक्त गर्नुभयो । उहाँले कतिपय प्राप्त सुझावहरु कार्यान्वयमा गइसकेको बताउदै सरोकारवालाहरुको समन्वय र सहकार्यमा काम अगाडि बढाउने बताउनुभयो । सीमित जनशक्तिबाट काम गर्नुपर्ने बाध्यात्मक अवस्था रहेकोले गर्दागदै कहिलेकाही सोचेजस्तो नभएको अवस्थामा सकारात्मक खवरदारी गर्न प्रमुख आचार्यले पत्रकारहरुलाई आग्रह गनुृभयो । उहाँले आफूले जानेर गलत नगर्ने र गर्न पनि नदिने भएकोले केही समस्या भए तत्काल जानकारी गराएर सहयोग गर्न अनुरोध गर्नुभएको छ ।
